احلامنا ..احلامى واحلامك ..كلنا لما ننام بنحلم احلام جميله او احلام مزعجة او احلام حديث نفس من العقل الباطن
ولكن هناك احلام اخرى ..هيا احلام اليقظه احلامنا للغد والمستقبل تلازمنا احلام اليقظه من واحنا صغيرين لحد مانكبر
وبتختلف المراحل واحنا اطفال بتكون احلامنا بسيطه بنحلم بفستان او جزمة العيد ..بنحلم بخروجه
بنحلم برحله او مصيف وحاجات كتيييير ...وتكبر معانا احلامنا بالكليه او بفارس الاحلام ..او باطفال جميله وذرية صالحه نربيها
وهكذا تلازمنا احلام اليقظه ..اوقات تكون احلام مستطاع تحقيقها وبتكون بذرتها الطموح والتخطيط للمستقبل
واوقات تكون احلام يقظه واسعه شويتين وخيال واسع اشى خيال ياناس
خطر ببالى حاجه غريبه ايه الفرق بين احلامنا نحن الجيل الحالى واحلام الاجيال الماضيه؟
ماهو لازم نحلم لاننا لو بطلنا نحلم نموت
بفتكر احلام الناس زمان الى سمعتها من اهالينا احلام بسيطه وجميله ودافيه ده على المستوى الاسرى
الولد بيحلم يكون متفوق وله افكارة واحلامة الوطنيه ويروح الجيش وهو كله فخر
بيحلم يحب البنت المثقفه الرقيقه الى لها افكارها واحلامها لكن كمان رومانسيه وفيها حب ودفء والدته
يحلموا ان البنت تتجوز راجل ابن حلال يصونها ويكبروا سوا مش مهم
البنت بدورها بتحلم بفارس رجل فيه صفا تالرجوله والوطنيه والتدين الى شايفاها فمثلها الاعلى والدها
ويعلموا ولادهم تعليم كويس ويطلعوا متفوقين كمان فى مواهب ودراستهم وعملهم
وبيحلموا كمان يحجوا ويزوروا البيت الحرام ومسجد الرسول
يااااه قد ايه احلام بسيطه وجميله ودافئة المشاعر
والاجمل والاروع كان بيجمعهم كلهم نفس الحلم نساء ورجال كبار وصغار
احلام بالوطنيه وحبهم لبلدهم حتى النخاع
احلام باننا نتقدم صناعيا وعلميا وتجاريا والاهم اننا نكون دوله ارادتها ارادة شعب يحكمه حد منهم
ولا يمكن يسيبوا شبر منها لمحتل او عدو حتى لو قصاده الاف والاف الدماء من الابناء والازواج
دلوقتى احلام الجيل الحالى ايه
لا يجمعنا حلم وطنى كلنا نعيش حالة انا بس اعيش عاوز اتجوز ولو متجوز عاوز اربى عيالى
كله مهموم بلقمة العيش وده مش غلط دى تقريرا للواقع
الاطفال حاليا بتحلم بالبلاى ستيشن والديلفرى ..بيحلم باجازة الصيف عشان المذاكرة والمدرسه اللعينه دى
يارب نصحى الصبح نلاقيها اتهدت عشان منروحش..يارب الثانويه العامة تتلغى والجامعه هتفوق
ليه وعشان ايه همه الى خدوا الشهادات بجيد جدا وامتياز كانوا اشتغلوا ولا اتعينوا الا بالكوسه
الولد بيحلم ازاى يهرب او ياخد اعفا من الجيش ..بيحلم يارب الاقى وظيفه اى وظيفه هو حد لاقى شغل
بيحلم ببنت زى نانسى وهيفا ومش عاوز ثقافه وتعليم ووجع دماغ عاوز الى اقوله يمشى
الاسره بتحلم بعريس غنى ومركز ومستقبل ووسيم ولما يعدى الوقت ويعدى اكتر ولان احلام الرجال وئدت انهم يلاقوا شقه او يلاقوا فلوس يتجوزوا بيها.. يبقا اى عريس هو حد لاقى
البنت بتحلم بعريس وسيم وشبة تامر حسنى او عمرو دياب او حماقى
ويكون غنى ونسافر والبس وونتفسح وعاوزاه يبقا سبور مش عاوزه خنقه
طبعا دول مش كل الولاد ولا البنات
بس نسبة وجودهم دلوقتى قد ايييييه؟؟
منكم لله يالى سرقتوا مننا حتى احلامنا
وصدرتولنا الياس والاحباط وزرعتوا فى الناس احلام استهلاكيه عشان الناس كل ماتحوش قرشين
يدفعوهم فى شوية كلام فارغ ويفضلوا فى دوامة الاستهلاك والتقسيط والديون
قتلتوا فينا احلامنا البسيطه الجميله
الطموح والحماس وحب بلدنا..باحلام تجمع المصريين تخليهم يحبوا بعض
بدل مانتشرت الجرائم والنصب والسرقه والقتل والغش
ياترى هيجى اليوم الى نقدر نحلم فيه تانى؟ ترجع احلامنا جميله وبسيطه وممكن تحقيقها؟
8 comments:
كل كلامك حقيقي ومؤلم جدا
وهو ده اجابة السؤال
ليه زمان كان بيطلع من كل ربوع بلادنا عملاقة
والآن لا يوجد الا اقزام
مؤلم قوي يا شموع
وحقيقي قوي
ربنا يصلح الحال
تحياتي
السلام عليكم
معلش متأخرة عليكي بس قريت اللي فاتني
كان عندي شغل في المدرسة عشان نهاية الموسم
في الغربة بتشوفي أنماط ناس عجيبة وخاصة الجيران فأنا بعد كام قرصة اتعلمت مختلطش بجيراني هناك ولا هنا صباح الخير يا جاري أفضل طريقة وبأهني في المناسبات وباعزي في المآتم وليس المطلوب أكثر من هذا
أنا ضحكت ضحك لما شفت حلقة البهائيين ولو تشوفي العميد بتاعهم يصعبوا عليكي ,,الغريب هو فيه ناس مشيعة كده !!!!
والأعجب اكتشافي إن حسين بيكار كان بهائي !!!
للأسف كنت باحترم الراجل ده نزل من عيني
أما عن الأحلام
حلم الجنة هو ما تبقى لي
فيارب يكون حقيقة
أما أحلام الدنيا فلي حلمين , حلم لنسمةأطمن عليها وتدخل كلية كويسة وربنا يرزقها بابن الحلال وحلم يكون ليا معاش وممات في المدينة المنورة برسول الله صلى الله عليه وسلم
وما ذلك على الله بعزيز
احلمي براحتك .. هم كمان حيصادروا أحلامنا ولا حياخدوا عليها ضريبة !!!
ربنا يحقق كل احلامك
ياااااااااااااااااارب
ستيته الجميله
كلامك صحححح زمان كان فعلا فى عمالقه فى كل حاجه فى الدين والعلم والادب والفن وكان فى اخلاق واحترام للعلم وحاجات كتيييير اوى
يارب كلنا نرج نصحيها تانى وناول ننقذمايمكن انقاذه
تحياتى
مجداويه الغاااااليه جدا
وحشتينى وفعلا بقالك فترة غايبه بس الحمد الله اطمنت عليكى
يارب كل احلامك الجميله تتحقق وربنا يجمعنا كلنا فى الجنه ويوفق نسمه لكل خير واحسن حال يارب وتفرحى بيها مع رجل صالح تقى
اما موضوع البهائيه ده والله مجننى يامجداويهرغم انه مش جديد بس غايظنى طريقة تعامل الاعلام والناس معاه
يعنى كلهم معترضين على الصحفى الى قال رايه ان من كان مسلما وذهب للبهائيه ده مرتد وكفر وشيفين انه تعصب وانه مفروض يتشال من النقابه بجد كلام فارغ والى يغيظك اكتر ان الى بيردد الكلام ده ناس هنا مدونين ومسلمين ومستندين على الايه لكم دينكم ولى دين
بجد حاجه غريبه اوى بقا فهمنا للدين مستورد من بره كمان ولا مبقاش عندنا غيره على دينا ومجتمعنا وولادنا
الله المستعان
تحياتى ليكى وعودا حميدا
السلام عليكم
كلامك حقائق
لا نختلف عنها
لكن نؤمن بأن هذا اليوم سيأتي
وسيحمل معه الكثير من الخير
هيجى اليوم الى نقدر نحلم فيه تانى؟ ترجع احلامنا جميله وبسيطه وممكن تحقيقها؟
أكيد هيجي
كل حاجة اتغيرت ..
الزمن اتغير .. الهوا اتغير .. المكان اتغير ..
لما كل حاجة هاتتغير ..
نفوس الناس هاتتغير وآمالهم هاتتغير ..
وبالتالى احلامهم هاتتغير ..
الله المستعان ..
تخيلى فعلا ان الطموحات و الاحلام اتغيرت منى الى اولادى احنا كان اقصى طموحنا طول الاسبوع ان الخميس يجى و نروح النادى دلوقتى ولادى النادى مش عاجبهم عايزين كنتاكى و ماك و غير كده بعد ما نمشى من هناكمفيش سعاده و لا امتنان يبقوا زعلانين عشان المكان التانى بيقدم لعب احلى مع وجبه الاطفال
احنا كنا راضيين و متواضعين و احلامنا حلوه للاسف دلوقتى مفيش كده
ياريت نقدر نرجع الاحلام الجميلة تانى ولو ان دة فى حد ذاته حلم بعيد المنال
تحياتى يا قمر
Post a Comment