CLICK HERE FOR THOUSANDS OF FREE BLOGGER TEMPLATES »

Tuesday, April 28, 2009

اليوم اجازة من معبدك



لم اعد اعلم اين اذهب ؟ فاعذرنى حبيبى اليوم فانا غاضبة منك ومن نفسى
دعنى ابتعد لالملم افكارى..لا استطيع ان اخط اشعارى
دعنى انفس عن تمردى الكامن داخلى ويصاحبنى فى ليلى ونهارى


لاتسالنى عن اسبابى ولا لماذا انا هكذا اليو م؟
هل سالت نفسك يوما من انا وماذا اريد؟

هل بحثت يوما عن شطحاتى المجنونه
وليالى الحالمة التى بالاشعار مسكونه

عن ابتهالاتى وتضرعاتى
عن ذكرياتى وجروحى التى تدق عظامى واهاتى؟

عن مستقبلى الات الذى يؤرقنى فى يقظتى وسباتى؟

ام احببت توهانى بين احلامك وافكارك
ذوبانى فيما يرضيك ويسعدك
فيما يبكيك ويقلقك
تلك العصفورة التى تطير فى معبدك
لم تعد تعلم من الدنيا ولاترى الا جدران معبدك

نسيت قافلتها من الطيور
نسيت لون الاشجار والزهور
ولكننى اليوم اريد ان اعلن غضبى

تلك المراه المتمرده بداخلى تمردت
اخبرتك من البداية انى مئة امرأه فى جسد واحد
واليوم
اريد ان ارى كيف تطير الطيور
استطيع ان اشم الزهور
فليست كل الزهور التى خلقها الله مثل زهورك التى تهدينى اياها حبيبى
من حقى ان اراها
ومن حقى ان اعلن ثورتى على طمس هويتى
من حقى اعلن اعتراضى على استغلال طيبتى


ومن حقى ايضا ان الوح بشارات الرحيل

نعم لاتندهش

فالحياة علمتنى ان الجرح الذى ترى شارات قدومه وحدوثه من بعيد او قريب ات .. ات
تعلمت الا اكذب واتوهم ان كل شىء بين يوم وليله سيصبح على مايرام
اعذرنى لن اطيل الكلام
اليوم اعطى الفتة المتمرده حقها واجازتها
لا تبحث عنى لانى ببساطه ساترك تنتظر
وتتسائل هل ساعود ام لا؟



البوست ده كنت كاتباه يمكن من سنة فاتت بس افتكرته الايام دى وحسيته اوى السبب مباشر وخاص بيا بس يمكن بقصص حوليا باحساس العلاقات الى فيها عدم توازن
يمكن اوقات كتيره بنحتاج اجازة وتمرد :-)
دى اول مشاركة فى الجمعيه :-)

Saturday, April 25, 2009

منى ..واحمد..كلاكيت تانى مره

مع مرور الايام جاء يوم عيد الميلاااااااد وكان هذا الحوار بين صديقة منى ياسمين وزوجها ياسر
بعد الغدا :كل سنة وانتى طيب ياحبيبى وعقبال مية سنة سوا بنحب بعض وبنخاف على بعض ويبقا شعرك ابيض ومركب طقم اسنان وافضل احبك واغير عليك
بنظرة دافئه وابتسامة عريضه وانتى طيبه بس مين ده الى شعره ابيض وطقم اسنان ايه ملكيش دعوه بسنانى وعموما ياستى ربنا يخليكوا ليا بس مش عارف ليه حاسس ان فى حاجه فعينيكى عاوزه تقوليها قرى واعترفى بسرعه وفورا :-)
هو بصراحه طلب صغير باختصار كده منى واحمد دول زمايلى من الجامعه ومنى عزيزه
عليا اوى وبصراحه انا حسيت امنها انهم بيمروا بنفس الحاله الى حصلتلنا ايام الحمل وبعد مابنوتتنا القمر جت بس همه موضوعهم اكبر وبقاله مده اطول خاصة انها عندها 3 واكلين كل وقتهم وجهدهم وفلوسهم وهمه ناس طيبين اوى ياياسر وانا بجد بيصعب عليا اوى اى بيت يكون فيه حب والظروف تبتدى تخطف منه الحب ده والتراب يغطيه
ياسر : ايوه ايوه طيب واحنا ممكن نعمل ايه ؟ ادخلى فى الموضوع وبعدين انا واحمد مش صحاب اوى ومعرفتوش الا لما بقينا جيران
ياسمين:ولا حاجه ياحبى كل المطلوب انك كده بذكائك ترمى اشارات من بعيد شوية
حاجات كده تفيدهم فى الحاله دى عشان انت عارف الحاله دى مش هيتخطوها الا سوا مش من طرف واحد والرجاله كلامهم مع بعض بيكون مختلف
وخلى بالك ان ده ثواب كبير وده بيت مسلم والدال على الخير كفاعله و
ياسر: خلاص ياحبيبتى انتى هتشحتى عليهم ماشى ربنا يسهل الامور ونشوف كده
واتكلم معاه لما تيجى المناسبه

جاء الوقت المحدد استعد منى واحمد للذهاب والاولاد لبسوا واتشيكو وله تمام

وبعد السلامات والبوسات والضحكات واكل التورته والجاتوهات ذهب الاطفال يلعبوا سوا فغرفة الاطفال باللعبات ولاد وبنات

وراحت ياسمين تشيل الحاجات عشان تعمل شاى وراحت تساعدها منى وبعدها جلسوا فى كورنر يرغوا فى نميمه الستات والحكايات

وجلس ياسر واحمد يتبادلو اطراف الحديث والكلمات

وبعد ماتحدثوا عن الشغل والمهمات وعن سياسة البلد وغلاء الاسعار فى المحلات

ياسر: ماشاء الله ولادك لذاذ وشكلهم مؤدبين ربنا يخليهملك

احمد :اااه لذاذ دول عفاريت هو احنا كنا اطفال ده احنا على كده كنا ملايكه
ياسر:الاجيال بتختلف حتى لعبهم ومناهجهم اختلفت كل حاجه اتغيرت ربنا يقدرنا ونحسن تربيتهم
احمد:اه والله دى الحاجه الى الواحد عايش عشانها يشوفهم فى احسن حال ويطمن عليهم ويبقى كمل رسالته
ياسر: ربنا يحفظهم وتفرح بيهم ويقدرنا احنا كمان..وبعدين ياعم احمد احنا بلاش نشوف نفسنا ولا ايه خلاص راحت علينا انت تقول نكمل رسالتنا وياسمين تقولى عقبال ماتبقى شعرك ابيض وتركب طقم اسنان ايه ياخوانا قلبتوها امينة رزق ويوسف بيك وهبى ليه هههههه
احمد: لا ياعم بس الولاد فعلا بياخدوا من حياة الواحد وبعدين احنا كمان جم ورا بعض وبياخدوا من مجهود مامتهم ووقتنا بقالنا فتره كل حياتنا روتين ايام المدرسه المذاكره والمصاريف ومنلحقش فى الاجازه نحضر للى السنة الجديده
ياسر:ربنا يعينكوا وتفرحوا بيهم عارف اقولك حاجه
انا بعد ماياسمين حملت وكان اول حمل ليها ومتعب وقلت زى بعضه لازم اقدر واستحمل لحد الولاده وبعد الولاده طبعا مفيش نوم طول الليل وارهاق من قلة النوم بالنهار والدنيا بقت روتين كاننا بقالنا 20 سنة متجوزين وانا حسيت انى بقالى سنة وشويه بحاول اقدر بس زهقت وهيا شايفه انى مش بساعدها وكل حاجه على راسها و..
احمد: طيب وانت هتساعد ازاى احنا بنرجع من الشغل تعبانين نرجع نساعد كمان وبعدين الحاجت دى ربنا خلق الستات هيا الى بتعرف تعملها بالفطره والصبر
ياسر: اقولك حاجه بصراحه انا كنت بقول زيك كده بردو كلنا متعودين امهاتنا كانوا بيعملولنا كل حاجه
بس لقيت الوضع كده ماشى كما هو كل واحد تعبان وزهقان فمره دخلت من بره وكانت مراتى مشغله شريط جايباه لشيخ بتسمعه وهيا عماله تنضف وتشتغل عن البيوت والعلاقات الزوجيه وطبعا كنت زهقان ومش عاوز اسمع المهم مرديتتش اقفله ولقيت بيقول جمله يمكن هيا نفسها مكنتش مركزه وسامعاها قال بعد ماتكلم عن ان الرسول كان بيعمل اهل بيته وبيخصف نعليه بنفسه علما بانه كان عنده اكتر من زوجه وكان قائد حرب ووراه مهمات كبيره لا وكمان اغلب زوجاته متفرغات مكانش فى اطفال شاغلينهم
قال ياجماعه الناس الى فى المصانع لما بيشغلوا الماكينات الحديد بيدوها فترة راحه من وقت للتانى وبيعملولها صيانه وتزييت عشان تفضل تشتغل وماتبوظش مابالك بمراتك البنىءادمه الى مش حديد
وتلاقى ستات فى الشعرينات وشكلها كانها فى الاربعينات وتبقا انت الى متدايق طيب حافظ حتى عليها عشان تقدر تواصل تخدمك انت وولادك وهو انت احسن من الرسول عليه الصلاة والسلام؟
احمد: والله كلامك وكلامه مظبوط بس ماحنا طلعنا لقينا امهاتنا واهالينا كلهم كده ومكانوش بيشتكوا وانا بتكون صعبانه عليا بس مبعرفش اعمل ايه فبحاول اقلل طلباتى واقول كتر خيرها
ياسر: لا يا احمد امهاتنا كان زمنهم مختلف وكان منهم كتير مش بيشتغلوا ومتفرغين والحياة كانت مختلفه
وبعدين انا لما فكرت لقيت الحل حاجات بسيطه حاجات اشيلها عنها اديها فرصه ترتاح او على الاقل احسسها انها فى حد جمبها بيقدر
وكمان الحاله النفسيه بتفرق بقيت احاول يوم وانا راجع اجيبلها ورده فى يوم فى الاسبوع نخرج سوا بعيد عن زيارت مامتى ومامتها العاديه يوم اسيب البنت عند ماما واقولها تعالى اوديى سينما ولانشترى حاجه وابتدت هيا كمان تحاول والامور تتغير وحست اننا عايشين مش مربوطين فى ساقيه
احمد: اديك قلت لازم نحاول وبعدين انت عارف لست هيا الى بتحتوى وتنظم بيتها و و
قبل الجواز وفشهر العسل يبقوا على سنجة عشرة من اول الحمل والولاده والمطبخ ولغسيل بيقلبوا التحول والمتحولون علطول ولو اتكلمت تبقا مش مقدر وانانى
ياسر: بس تفتكر لو فيوم جبتلها ورده او احتفلتوا بعيد جوازكم او جبتلها برفان او اى حاجه من الستات بتحبها او رومانسيه تفتكر هيا مش هتهتم بنفسها بعدها؟لكن تفتكر لما هيا تقصر وتحس انه كله محصل بعضه هتكمل
الى اكتشفته عن تجربه ان الست دى مصدر الحنان اديها قيراط حنان هتديك عشره و 24 كمان قيراط حنان حسسها بالاهتمام والتقدير والحب هتقابله باكتر واكتر
لو كل واحد استنى التانى يتحرك هنفضل مستنيييييييين
انت عارف كلامى ده صحابى كتير بيقولولى انت رايق وحبيب بس بعد فتره فى منهم الى جربه والدنيا اتصلحت وفى منهم الى فضل عاند وبيشتكى ومنهم الى شافله شوفه تانيه بره
وانا الحمدالله بحب بيتى وعاوز احافظ عليه ومش عاوز لابره ولا نانسى ولاهيفا ياعم
احمد : والله عندك حق كل مابفتكر منى ايام الكليه بقول هو ايه الى حصلنا احنا مالنا بقينا عاملين زى الى هيطلعوا معاش

وجت منى وياسمين بعد مناوشات الاطفال متلعبوش بدى وخدوا بالكو دى تتكسر ....وبعدين بلاش دوشه و و و

بص احمد ومنى فى الساعه لقوا الوقت جرى وسلموا واستاذنوا وبعدما اغلق البااااااب

بصت ياسمين بنظره كلها فضول و تنطيط هاااااا قولى اتكلمتوا ولا ايه؟؟

ياس رر جع للكرسى وقعد

كنا عمالين نتكلم عن الشغل والكلام خدنا وملقتش مناسبه للكلام تتعوض ياستى ان شاء الله

وبعد ما احبطت ياسمين وقالت كده بردو ياياسر هو انا طالبه حاجه لنفسى

قام ياسر ومسك ايدها وباسها وقلها كل سنة وانتى طيبه يا اجمل زوجه جميله وطيبه

انا مقدرش ازعلك ..متقلقيش كلمته واديته كلام كتيييير

انتوا الستات كده مبيعجبكوش حاجه ابدا :-)

وابتسمت ياسمين و

الى اللقاء


Sunday, April 12, 2009

منى ...واحمد

كان يامكان فى سالف العصر والاوان يحكى انه

من زماااان واحنا اتعودنا نشوف فى الافلام الابيض واسود الرومانسيه الفظيعه دى قصة منى واحمد وخاصة فى النهايات السعيده لما ينادوا على بعض منى احماااااااااااااد
والناس حبت منى واحمد وبقت ناس كتييييير يسموا منى واحمد
وبقت كل منى وغير منى بتدور على احمد الى هتجوزه وكل احمد وغير احمد بيدور على منى الجميله الرومانسيه
ومنى كانت بنت موهوبه ذكيه جميله ومميزه فى دراستها وصديقاتها وجامعتها
وعلى مرور السنوات الدراسه كانت بتحلم مين ياترى احمد الى هيقدر يخطف قلبى فيوم من الايام
ومرت الايام والسنوات الى ان وجدت احمد الى حب فيها ذكائها وهواياتها قبل مايحب جمالها ورقتها
احمد حس انه لقا الجوهره الى بتجمع كل الوان الورود مع بعض
ومنى حبته لشخصه وحبت تقديره وحبه لها وتفهمها ورجولته
ولبست الفستان الابيض ولبس احمد البدله السودا وتزوجوا وعاشوا فتبات ونبات وخلفوا صبيان وبنات
وفى ذات الايام بعد مرور السنوات حصلت المكالمه دى من صديقه لمنى ايام الجامعه بعد زيارتين تلاته لانهم اصبحوا جيران بعد مرور السنوات ...الصديقه :ازيك يامنى اخبارك اييييه مش عاوزه اى مساعده فى اى حاجه الجيران لبعضها ياستى واحنا فوق ده صحاب من زمان بس كله بتمنه مفيش حاجه لله ..اه عشان تبقى على النور لان العلم اييييييه نورون :-)
منى:تسلمى ياجميل بس مساعده على ايه ماتعودنا خلاص على الولاد وشقاوتهم وتعب البيت
الصديقه :لا طبعا النهارده غيييييير ايه يابنتى انتوا مش النهارده عيد جوازكم بصى قوليلى بجد لو عاوزه تنزلى او تجيبى حاجه او كده واخد بالى من الولاد انا تحت امرك من عونيا الاتنين يللا كله بثوابه
ضحكت منى :عيد جواز ايه ده يابنتى الى بيبقوا لسه بقالهم سنتين تلاته متجوزين وبعدين احنا مبنحتفلش والاحتفال بيه مش من الدين فحاجه وغير كده انا بجيبله هديه حاجه يكون محتاجها وهو بيجيبلى هديه رقيقه وبتمشى الامور
وبعدين هو احنا بنعرف نتلفت من الولاد
الصديقه: امممممم انتى مالك قلبتى على امينة رزق كده ليه والبؤساء هو انتوا بقالكوا اليوبيل الفضى وبعدين لو كملتوه بيحتفلوا بيه بردو وياستى مش موضوع دين بس من وقت للتانى الحياة الزوجيه بتحتاج تغيير كده وحبة رومانسيات
منى:والله انتى شكلك رايق وبعدين اقولك واطمنك مش انا لوحدى الى مسئولية البيت والولاد لا كمان احمد بقت نظرتنا للحب والرومانسية مختلفه نخرج الولاد يوم بره نقعد يوم سوا فى البيت الاجازه يرتاح هو من الشغل اعملهم اكله ونتفرج على التلفزيون
كل واحده فيهم انشغلت بواجباتها اليوميه خصوصا انهم بيعملوا وعاوزين يلحقوا الغدا
بقا وواجبات المدررسه
فى اتصال اخر
الصديقه:ازيك ياجميل بقولك ايييييه انا سمعت من واحده معايا فى الشغل بيبيع حاجات حلوه لبس ولبس للبيت باسعار حلوه وعامل تخفيضات الايام دى ماتيجى نروح سوا
منى: والله مش عارفه والله بس هسيب الولاد مع مين وبعدين باباهم ميقدرش عليهم لوحده خلقه ضيق
هو بيبيع ايه بالظبط او لبس ايه وفين مكانه
الصديقه:بيبيع ياستى لبس لللبيت وحركات وجينزات وبديهات
منى: طب بذمتك ده هجيب منه ايه هو احنا بنلبس الحاجات دى فشغلنا ولا بره وبعدين هننزل مخصوص نجيب لبس بيت ياستى البيت مش مستاهل لما نقضى على لبس الخروج والولاد لبس البيت ده نجيبه اى وقت وحاجه عاملين عليها تخفيضات
اطلقت الصديقه ضحكه قويه جدااااااا
منى: مالك يابنتى بتضحكى على ايه انتى لاسعه من زمان بس ايه الى حصل
الصديقه: اصلى افتكرت نكته بسبب كلامك عارفاها نكته ام عماد
لما ام عماد زوجها الجميل ابو عماد قالها ان ناس من اشغل عنده عازمهم زميله ومراته اتشيكت بقا ولبست وبقالها مده لاتحط ميك اب ولا حاجه فدهش ابو عماد وقالها ايه كل المكياج والشياكه دى امال مبنشوفش نصهم ليه طول السنه
قالته يووووه بقا يابو عماد لهو انت غريب ياخوياااااا
وعاودت ضحكاتها
منى:قالتلها وانا بقا فكرتك بام عماد ليه مش بقولك لاسعه من يومك
قالتلها : اقولك ومتزعليش ..يعنى انا بستغرب اوى الست الى تيجى نازله تخرج ولا رايحه الشغل تهتم بشكلها ولبسها وتحط مكياج واول ماترجع البيت تهد كل ده وتلبس لبس البيت الى بقاله كزا سنه على اساس انه ابو عماد مش غريب والحاجات دى للغرب
تفتكرى ان ده صح ؟ تفتكرى ان ده حلال ولا حرام؟
منى: بس انا الحمد الله بهتم بلبسى انيق فى خروجى بس مبتجاوزش فيه وبحاول دايما يكون حجاب يرضى ربنا
الصديقه: طبعا ماختلفناش بس احنا بنهتم باناقتنا للناس الغرب طب وجوزى؟ وبعدين ايه المانع انى اجيب الجنزات والبديهات ولبس حركات وكل حاجه جديده البسها فى البيت واهو ده الى حلال بجد
منى: مش بقولك رايقه ..اصلك لسه معندكيش غير بنوته ومجبتيش الولاد ورا بعض زى حالاتى بكره تجربى..وبعدين البس الحاجات دى ازاى قدام الولاد ده ازا لقيت وقت
الصديقه: لا يامنى الموضوع مش موضوع ولاد انا هقولك رايى بقا من 3 محاور ركزى بقا معايا
خدى بالك من المحاور :-)
الاولانى انه كل حاجه على الولاد انتى لسه صغيره انتى واحمد ومش معنى ان عندنا ولاد والحياه والمشاغل تنسينا حياتنا ونفسنا ونخلى العنكبويت كل يوم ينسج خيط من خيوط الملل والرتابه فحياتنا لحد مايكمل شبكته بعد سنوات ويخنقنا ونقول فين ايام الخطوبه وشهر العسل زى ماولادنا ليهم حق علينا احمد ليه حق عليكى وانتى كمان ليكى حق عليه
وولادكو ان شاء الله ربنا يحفظهم ويكبروا ويتعلموا ويشتغلوا ويتجوزوا وانتوا الى هتفضلوا لبعض
تانى حاجه: موضوع الولاد انتى هتعملى حاجه غلط؟ انتى بتلبسى لبس حلو بس منقدرش نلبسه فى الشارع ارضاء لربنا وفنفس الوقت بسعد نفسى انى اعيش انوثتى واسعد زوجى بانه لما ينظر ليا يسر زى الرسول عليه الصلاة والسلام ماقال اذا نظر اليها سرته
وكمان انتى بتعلميهم حاجه حلوه ان ماما انيقه بره البيت بما يرضى الله ويرضى بابا وجوه البيت هيا جميله وبتلبس الى بيشوفوه فى الشارع لان ده حلال هيتعلموا قيمه حلوه
ثالث حاجه وانا عارفه انى زهقتك :فين منى الى كانت عينيها بتلمع وهواياتها وتفوقها وجمالها انا عارفه انى زودت العيار حبتين انتى لسه محتفظه بده كله بس النسبه اختلفت واكيد عمر ما ايام الجامعه والشقاوة هتيجى جمب الشغل والمسؤوليات والمدارس والفلوس
بس برده احنا بايدينا نعمل حياه جوه بيوتنا احلى وبحاجات بسيطه
محتاجه انتى واحمد تعملوا بريك تطبطبوا على بعض فيه من سباق الحياه ومتاعبها
تلتقطوا انفاسكوا عشان تكملوا ..تدوا لبعض شويه دفء يكون شحنه لبرد الدنيا وقسوتها..يامنى الزوج مهما كبر وشفتيه قوى وشايل مسؤوليات وبيقول انه كله تمام الا انه جواه اخر اليوم بليل بيكون مستنى كلمة طيبه رقيقه لما يبقا تعبان يحس بنظرة حنان وطبطبه على كتفه اااااه والله طبطبه بقا تصدقى انها بتفرق كتيييييير
طب وانتى بذمتك بعد تعب كل يوم ده وطول الاسبوع مش بيكون نفسك انك تقعدوا قعده هاديه كده بعيد عن الولاد وترتاحى شويه ويطمنك وتحسى بحنان الحبيب والاب
وكمان خدى بالك ان........
انتى معايا يامنى؟؟
منى: فى صوت من وراء مكان بعييييييد ..ايوه معاكى
الصديقه: سورى يامنى لو كنت دايقتك وزودتها اقولك حاجه انا والله بقولك كده لانك غاليه عندى ولانى مريت بالتجربه دى اول ماخلفت بنتى ومن ايام تعبى فحملها
وحسيت ان حبنا بيضيع والمشاكل كترت وبعدها دخل الصمت والملل بيتنا ووقفت مع نفسى وطلعت بكل الى قلتهولك قبل مافوق على اى حاجه تدايقنى او تبقا عيشتنا عايشين عشان الولاد وخلاص
وانا بجد اسفه لو كنت دايقتك
الو
الو
منى: ايوه معاكى.. انا مش زعلانه منك بالعكس انتى كلامك يمكن جه على اوتار كتير كنت بهرب منها فى السنين الى فاتت وكنت بقول اهم حاجه طلعت بيها ان ولادى يكون احسن ناس فى الدنيا
كلامك خلانى اسرح وبجد انا الى هقولك ميرسى انك قلتيلى كل ده عشان افكر فيه
الصديقه:طيب الحمد الله انتىمش عارفه غلاوتك عندى
ها قولى بقا هنروح للمحل ولا اييييييييه ؟
وبعدين كمان اعملى حسابك ان الاسبوع الجاى معزومين على عيد ميلاد جوزى احنا مبنحتفلش بيه كل سنه بس انا حبيت اعملها كده تغيير وهديه عشان خاطره واعملى حسابك لازم تيجى ...عارفه الجمله بتاعة للاعتذار اخبطى دماغك فى الحيطه
وطبعا كانت الصديقه فدماغها فكره شريره انها تجمع جوزها واحمد عشان هيدور بينهم حوارات ياترى ايه هياااااا
الصديقه دى لاسعه من زمان بس هنشوف حلقة احمد المره القادمه

Thursday, April 9, 2009

الليبراليه بالمهلبيه




عندى حاله من جاتلى من مواقف كتير حسيت منها اننا الان فى عصر التدين التيك اواى حاله حال كل شىء حولنا




فكل شىء فى حياتنا اصبح تيك اواى ولم يسلم ديننا الذى نعتنقه من منهاج حياة وعقيده تذهب معنا فى كل مكان او زمان الى تيك اواى ناخد الى احنا عاوزينه وقتما نشاء وكاننا فى طريقنا لاستجابه لما يحدث من موجة العلمانيه والليبراليه وفصل الدين عن الحكومه والمجتمع


بعد كوا موقف حسيت انى عاملة زى توم فى الكارتون لما كان بيتخبط ةتلف حولين راسه عصافير ونجوم وعينيه مبحلقه وفيها دواير حمرا كتير عااااا


المهم نيجى للمواقف


تقدمت المحاميه نجلاء الامام بمشروع قانون لمنع تعدد الزوجات وان لايتم زواج متزوج الا بموافقة القاضى لشروط محدده


وثانيا يتم الغاء الماده الثانيه من الدستور بعيدا عن الاديان او الدين الاسلامى وسلملى على التدين الحكومى قال يعنى شايفه الحكومه بتطبق اوى


والا يتم تغيير ديانة اطفال معتنقى الاسلام الا عند بلوغ 21 سنة ليختار بنفسه الدين الى يناسبه


ومن ثم قام البعض على راى السادات فى ناس بتنفخ فى النار وبحذرهم جميعا ان الديمقراطيه لها انياب


المهم قاموا بتكفيرها لافكارها دى وهكذا قوم ايييييه بقا قامت المحاميه العظيمه اعلنت انها تشك فى مصداقية الاسلام وانه ليس دين وانما من تاليف شخص كانت اولوياته اقامة الدوله وانها ترفض اسلامها الى طلعت لقت نفسها مسلمه وان مصر ستنهض يوم مالبنات والستات تقلع الحجاب ومتكسفش من اجسادها


وده سمعته منها بنفسى فى موقع على النت وسالتها وهل تركتى الاسلام؟ قالتلى لا انا هفضل كده مسلمه عشان اعذبكوا وهاجمكوا ويبقا شهد شاهد من اهلها !!!!!!!




يللا قلنا ربنا يهديها وخدنا شوية كمادات ساقعه


واذا بالموقف التالى بفتح القناة الاولى الى نادراااا مابجيبها الاقى بسمه وهبه مذيعة اقرا الى تركت القناة والبرنامج الدينى وتركت معاهم حجابها التى ارتدته لعشر سنوات طبعا ده موضوع قديم لكن مالفت انتباهى ونط فنافوخ بتاع الانا الى كان متغاظ وهيا بتحاور اصاله وعامله نيو لوك واخر دلع ونفسى ابعتلها السؤال ده


هل ده الى لقيتى نفسك فيه؟ هل دى الرساله والنجاح لى بتتمنيه انك تعملى برنامج مع الفنانين والمطربات الى اصغر مذيعه مش معروفه بتعمل الحورات دى هو ده الى سبتى عشانه حجابك وغيرتى قناعتاك من اجلله


يافرحة جوزك ولادك الاتنين واهلك كلهم بيكى


وطبعا لايخفى عن العينين المبحلقين ان القناة الاولى بارك الله فيها وشكر الله سعيها احتضنتها بسرعه لتترك لها المجال لبرنامجها القوى واستضافة الكبار من الفنانين والفنانات وترابتاااااات




قلنا يارب يهديها ويثبتنا ولايردنا اليه مفتونين ولا ضالين ولامضلين




والاقى ميييين بقا


هذا العبدون الى لم ارى اسخف ولا اكثر سماجه منه فى حياتى


شخص لا يهتم برنامجه الا بغريب الفتاوى لاحداث البلبله وان الجرايد تكتب عنه ليشعر بالشهره ابتدا من فتوى جواز قراءة القران بالمايو الى المدعوه سعاد صالح الى اباحت ان يجوز الا تخبر الغير عذراء من تزوج بالحقيقه وتعمل عمليه حفاظا على الستر


وطبعا سعاد صالح ضيفه دااائمة عنده وعند كل البرامج ويوم مابتطلعش فى التفزيون بتكلم بالتلفون للبرنامج حاسه انى هفتح الحنفيه الاقيها فوشى بجد ترحمنا بقااااااا من فتواها الغريبه


لا وكمان مقدم برنامج دينى وجاااااهل


بتقوله ابن تيميه قالها ايوه مش ده شيعى


هاااا ميييييين انا وقعت على ودانى وانا صغيره الجهووووول البعيد بيقول مين شيعى؟؟


قالت لا طبعا مش شيعى ده شيخ الاسلام قالها اه وسكت


وسلملى على البرامج الدينيه




قلنا نعديها وقلنا مية مره ان الاعلام ده موجه وموجه عشان يقول حاجات معينه متوجعيش دماغك




الاقى الاستاذ الى كنت بحترمه ابراهيم عيسى بقاله فتره عمال يتكلم فى الدين ويفتى ويقول رايه طيب هو اى حد يفتى ويتكلم فى الدين ويدافع عن الشيعه والبهائيين ويقول انه بيحترمهم وبيحترم كل الناس اياا كانت ديانتهم وانه ضد التطرف والتعصب طبعا كل ده كلام كويس اما انه يقول كل واحد حر لا مش كل واحد حر مالم يضر غيره وينشر افكاره ويسب الصحابه ويلعنهم ويسىء للرسول وينشر افكاره زى البهائيين ولا ده بردو تبع الدين لله والوطن للجميع وكل واحد يعمل الى هو عاوزه


ماحنا فضلنا نقول كل واحد يعمل الى هو عاوزه لحد مازاد الادمان والانحراف وزاد افلام القبيحه وزاد المثليين والشواذ وزاد وزاد وزاد لكن نيجى عند الناس الى بتكلم عن الدين ونزعل ونقول متعصبين ارهابين وحشين


الصحفى الى قال للدكتوره بسمه البهائيه قالها انتى تعتبرى مرتده لانك تركتى الاسلام يبقا وحش ولازم يتفصل من النقابه


لكن اى حاجه تانيه تمام وزى الفل

والختام بقا كااااان الفتوى والسماح بجواز المسار بموافقة السيد الرئيس طب والله صعبان عليا هيلاحق على ايه ولا ايه كل حاجه بموافقته كده انتوا شعب مبيرحمش الراجل كده هيعيا وهتروح صحته وانتوا مش عاجبكوا واهو حل ازمة الجواز والعنوسه
وسلملى على الاتوبييييييييس




وسلملى على الليبراليه بالمهلبيه والمكسرات


Saturday, April 4, 2009

احلام ماضيه واحلام وئدت


احلامنا ..احلامى واحلامك ..كلنا لما ننام بنحلم احلام جميله او احلام مزعجة او احلام حديث نفس من العقل الباطن
ولكن هناك احلام اخرى ..هيا احلام اليقظه احلامنا للغد والمستقبل تلازمنا احلام اليقظه من واحنا صغيرين لحد مانكبر
وبتختلف المراحل واحنا اطفال بتكون احلامنا بسيطه بنحلم بفستان او جزمة العيد ..بنحلم بخروجه
بنحلم برحله او مصيف وحاجات كتيييير ...وتكبر معانا احلامنا بالكليه او بفارس الاحلام ..او باطفال جميله وذرية صالحه نربيها
وهكذا تلازمنا احلام اليقظه ..اوقات تكون احلام مستطاع تحقيقها وبتكون بذرتها الطموح والتخطيط للمستقبل
واوقات تكون احلام يقظه واسعه شويتين وخيال واسع اشى خيال ياناس
خطر ببالى حاجه غريبه ايه الفرق بين احلامنا نحن الجيل الحالى واحلام الاجيال الماضيه؟
ماهو لازم نحلم لاننا لو بطلنا نحلم نموت
بفتكر احلام الناس زمان الى سمعتها من اهالينا احلام بسيطه وجميله ودافيه ده على المستوى الاسرى
الولد بيحلم يكون متفوق وله افكارة واحلامة الوطنيه ويروح الجيش وهو كله فخر
بيحلم يحب البنت المثقفه الرقيقه الى لها افكارها واحلامها لكن كمان رومانسيه وفيها حب ودفء والدته
يحلموا ان البنت تتجوز راجل ابن حلال يصونها ويكبروا سوا مش مهم
البنت بدورها بتحلم بفارس رجل فيه صفا تالرجوله والوطنيه والتدين الى شايفاها فمثلها الاعلى والدها
ويعلموا ولادهم تعليم كويس ويطلعوا متفوقين كمان فى مواهب ودراستهم وعملهم
وبيحلموا كمان يحجوا ويزوروا البيت الحرام ومسجد الرسول
يااااه قد ايه احلام بسيطه وجميله ودافئة المشاعر
والاجمل والاروع كان بيجمعهم كلهم نفس الحلم نساء ورجال كبار وصغار
احلام بالوطنيه وحبهم لبلدهم حتى النخاع
احلام باننا نتقدم صناعيا وعلميا وتجاريا والاهم اننا نكون دوله ارادتها ارادة شعب يحكمه حد منهم
ولا يمكن يسيبوا شبر منها لمحتل او عدو حتى لو قصاده الاف والاف الدماء من الابناء والازواج
دلوقتى احلام الجيل الحالى ايه
لا يجمعنا حلم وطنى كلنا نعيش حالة انا بس اعيش عاوز اتجوز ولو متجوز عاوز اربى عيالى
كله مهموم بلقمة العيش وده مش غلط دى تقريرا للواقع
الاطفال حاليا بتحلم بالبلاى ستيشن والديلفرى ..بيحلم باجازة الصيف عشان المذاكرة والمدرسه اللعينه دى
يارب نصحى الصبح نلاقيها اتهدت عشان منروحش..يارب الثانويه العامة تتلغى والجامعه هتفوق
ليه وعشان ايه همه الى خدوا الشهادات بجيد جدا وامتياز كانوا اشتغلوا ولا اتعينوا الا بالكوسه
الولد بيحلم ازاى يهرب او ياخد اعفا من الجيش ..بيحلم يارب الاقى وظيفه اى وظيفه هو حد لاقى شغل
بيحلم ببنت زى نانسى وهيفا ومش عاوز ثقافه وتعليم ووجع دماغ عاوز الى اقوله يمشى
الاسره بتحلم بعريس غنى ومركز ومستقبل ووسيم ولما يعدى الوقت ويعدى اكتر ولان احلام الرجال وئدت انهم يلاقوا شقه او يلاقوا فلوس يتجوزوا بيها.. يبقا اى عريس هو حد لاقى
البنت بتحلم بعريس وسيم وشبة تامر حسنى او عمرو دياب او حماقى
ويكون غنى ونسافر والبس وونتفسح وعاوزاه يبقا سبور مش عاوزه خنقه
طبعا دول مش كل الولاد ولا البنات
بس نسبة وجودهم دلوقتى قد ايييييه؟؟
منكم لله يالى سرقتوا مننا حتى احلامنا
وصدرتولنا الياس والاحباط وزرعتوا فى الناس احلام استهلاكيه عشان الناس كل ماتحوش قرشين
يدفعوهم فى شوية كلام فارغ ويفضلوا فى دوامة الاستهلاك والتقسيط والديون
قتلتوا فينا احلامنا البسيطه الجميله
الطموح والحماس وحب بلدنا..باحلام تجمع المصريين تخليهم يحبوا بعض
بدل مانتشرت الجرائم والنصب والسرقه والقتل والغش
ياترى هيجى اليوم الى نقدر نحلم فيه تانى؟ ترجع احلامنا جميله وبسيطه وممكن تحقيقها؟

Tuesday, March 31, 2009

ياترى الثرثرة جواها اييييه؟؟



من فترة كد نظرا لظروف الغربه الجديده الى انا فيها ببعت لصحابى من وقت للتانى وبنتكلم واحده منهم رغم انها صاحبتى جدا بقالنا سنيييين من ايام المدرسه الا انها ردود افعالها غريبه يعنى هيا بطبعها فضوليه بس لما اقولها الغربه صعبه تقولى يابنتى اتعودى

مفيش جديد مشتغلتيش مفيش بيبى كمان شوية وتسال نفس السؤال وشوية وتكرار من غير ماتفهم ولا تتفاهم وبعدها طيب شدوا حيلكوا!!!!مفهمتش موقع شدوا حيلكوا من الاعراب خالص


الموقف التانى واحده هنا اتعرفت عليها فى مدرسة لتحفيظ القران قلت اشغل وقتى بحاجه مفيده اول كلامها معايا هيا غير مصريه
بالمناسبه ولو انها مش هتفرق كتير ..انتى ساكنه فين ده عادى بعدها علطول وجوزك بيشتغل فين عادى بردو تاللت سؤال وساكنين

شقتكوا ايجارها كم؟؟؟

طبعا للى مش عارف هنا الايجارات حسب مستوى الدخل يعنى مرتبك على قدك هتسكن على قدك والعكس مع انه ممكن مرتب عالى ويسكن على قده عاوز يحوش ففهمت انها عاوزه حاجه من اتنين يا فضولا منها ياثانيا تشوف مستوايا وتكمل بقا ولا تسيبنى وتمشى


فى مواقف كتيييير عن الفضول فحياتنا ومناخيرنا الى بنحشرها فحياة الناس بشكل مش طبيعى
والموضوع ده مش صح تماما
وبجد كمان الاكتر بقا انه مش من الاسلام لان الرسول صلى الله عليه وسلم قال من حسن اسلام المرء تركه مالايعنيه


المثال ده بقا حصل معايا بردو ومش بقول انه مثال صح بس دى قناعتى وده كان تصرفى

ليا جارة هنا عرفتها من فترة صغيره اوى والمهم حكتلى فمرة على شىء يخصها بتاخر الانجاب وكده وانها بتروح للدكتورة وكده وهيا
الى حكت والله انا من نفسى مابفتح معاها اى موضوع يخص ده ولا عملتى ايه ولا وصلتى لفين انا الاول قلتلها لو عزتى اجى
معاكى للدكتورة او عرتى اى حاجه قوليلى علطول ومتكسفيش ده على اساس انى عندى خلفيه طبيه مش اكتر

ومبفتحش الموضوع ده تماما معاها الا لما تفتحه هيا لان بحس ان مش معنى انها حكتلى وفضفضت انى اقتحم حياتها كل شويه وكل الى بعمله انى بدعيلها فى صلواتى بظهر الغيب ان ربنا يرزقها


بجد محتاجين نبطل نكون فضوليين ونجرح بعض ونرجع نقول مش قصدنا عادى بلاش حساسيه

الاكتر كمان بجد والكلام ده ليا قبل اى حد بجد نفسى اننا كلنا نقاوم الغيبه والنميمه الى ممكن نقع فيها واحنا مش قاصدين انا عارفه ان ان شاء الله كلنا اهل خير ومحدش متعمد بس اوقات بتحصل لما بنتدايق ونتعصب ونحب نشتكى ولا نفضفض مع حد ونغتاب فلانه او علانه

الصعب بقا انها بجد حرام والا كتر ان الى اغتبه هيجى ياخد من حسناتنا يوم القيامه او لو الحسنات خلصت يحطلنا سيئات يعنى مشكله كبييييييره اوى لما بتخيلها بجد حاجه صعبه

اجمل حاجه بجد هيا اسلامنا العظيم
الى نفضل نحمد ربنا عليه حمدا كثيرا

بجد مش متخيله يعنى ربنا سبحانه وتعالى قد اييييييه بيغير على عبده الى خلقه وبيحبه وبيحافظ على حرماته وبيحرم الى بيزعله حرم الكذب عشان محدش يخدعك وحرم الغيبه عشان محدش يغلط فيك من وراك وحرم الفضول والتدخل فيما لايعنيه عشان يكون عندك خصوصيتك وحرم النميمه عشان ميحصلش وقيعه بين الناس
قد كده ربنا بيحافظ علينا ومخلينا نحترم بعض ولكل واحد له حرمته وعوراته وخصوصياته
لكن للاسف احنا بنعمل ايه فبعض؟؟

نفسى كلنا من دلوقتى نقول الكلام المبااااح ومبااااح حتى الصباح كمان زى شهرزاد بس بعيييدا عن ككل ماسبق ذكرة من غيبه وفضول ونميمه وكذب
يلا نبتدى الحمله دى كلنا سوا على انفسنا

Sunday, March 29, 2009

لا للبهائيه والف لا كمان

لا للبهائية والف لا كمااااان
قال ايه فرحانين اوى بعيد النيروز وراحوا عملوه فى حديقة عامة وجابهم برنامج الحقيقه عل دريم وهمه فرحانين اوى ونازلين لمدونين لبهائيين فرحه طاغيه هييييييه طلعنا فى التلفزيون هيييييييه وصلنا صوتنا للناس
بلا خييييييييبه والف خيييييبه كمان
بهائية ايه وكلام فارغ مييييييين
مين بهاء الله ده يطلع اييييه ولا مين ؟؟ ومتفتكرش منك ليه انى بقول كده عشان انا معرفوش ولا قريت عنه بس عشان هو نكره بنىءادم مخلوق عارف يعنى ايه مخلوق مين الى خلقه وخلقك والى الهه مالهكش انت ليه يافالح منك ليه؟؟
وفرحانين اوى شباب البهائية البتنجانيه
صحيح الى مش لاقى حاجه يعملها يدورله على ى فكر جديد جاى من بره يمشى وراة نطول شعرنا مره ايموز مره بهائى مره مش عارف مين ويللا ادينا لينا فكر ومختلفين وبنطلع فى التلفزيووووون
وابقا سلملى على عيد النيروووووز سلامين وحته
وسلملى على بهاء الله لما تروحوا بسببه النار اذا ربنا ماكتبش لكم الهدايه قبل ماتموتوا


المشكله ان فى ناس بيكون وراها مصالح سياسية وماديه ورا الحاجات دى واحنا بنمش ى وراهم زى القطيييييع ونقول قال ايه بهائيييين ههههههه
طب ياجماعة الخير
معلش انا النهارده عصبيه ويمكن اول مره تشوفونى كده بعد ماحطيت بوست الكاريكاتير وقلت خلينا نخفف شوية الجو المظلم لكن نعمل ايه مابليد حيله ياولاد
تيجو نروح الجونينه سوا وناخد لفة فى الكتاب الاقدس الى الفه بهاء الله بتاعهم او بتاعكم لو بتقروا ومعلش انا يادوب يعنى علامى على ادى كده دكتورة على ماقسم ومش عارفه افهم الكلام ده حد يفهمهولى معناه ايه بهاء البتنجان ده

من يحزن احدا فله ان ينفق تسعة عشر مثقالا من الذهب هذا ماحكم به مولى العالمين....وطبعا بيقصد نفسه)
(( اغسلوا ارجلكم كل يوم فى الصيف وفى لشتاء كل ثلاثة ايام مرة واحده ومن اغتاط قابلوة بالرفق

ينبغى اليوم لمن شرب رحيق الحيوان من يد الطاف ربة الرحمن ن يكون فياضا كالشريان فى كل مكان

وجعلنا الدار المسكونة والالبسة المخصومة للذرية للذكران دون الاناث والوراث انه هو المعطى الفياض

نكمل كمان شوية كلام من الدماغ المتكلفه دى واللغه غاية فى الركاكه
ولا كفايه كده ؟؟


انا بقول كفايه وبقول لكل الناس دى دوروا على الحق الواضح الجلى الموضوع مش هزار دى اخرة وجنه ونار
سبحانك ربى تخلق ويعبد سواك
ترزق ويشكر سواك
خيرك الينا نازل وشرنا اليك طالع
سبحانك ربى ر اله الا انت
اشهد انه لا اله الا الله واشهد ان محمدا رسول الله
اللهم احينا وامتنا على الاسلام وارزقنا النظر الى وجهك الكريم والشرب من حوض نبيك الشريف


ومما زا دنى تيها وفخرا
وكدت باخمصى اطأ الثريا
دخولى تحت قولك ياعبادى
وان صيرت احمد لى نبيا


صلى الله عليه وسلم

اللهم قنا شر الفتن ماظهر منها ومابطن
اللهم ارنا الحق حقا وارزقنا اتباعه وارنا الباطل باطلا وارزقنا اجتنابه

**اعتذر بشده عن صغر الخط سابقا لانى حاولت اكبرة مثل قبل ومانفعش كانه بيعند معايا

شوية كاريكاتير؟؟؟





































اختفيت فترة لظروف صحيه ورجعت تانى واسفه على كل التعليقات الى مرديتش عليها








الفترة دى بتسود حالة من الاكتئاب وده اقل واجب يعنى بالنوسبة للظروف الى حوالينا ومش عارفين اخرتها لحد فيييييين








المهم قلت تسخين كده اسيبكو شويه مع بعض الكاريكاتير ده زى مابيقولوا شر البلية مايضحك وكمان الشعب المصرى دايما ابن نكته بيعرف يتاقلم ويتعايش ويطلع لنكته من قلب الاسد قصدى من قلب الاحزان
























Friday, March 13, 2009

تبا للعرب؟؟



































































الصور دى جتلى فى ايميل وبجد جتلى حاله من وجع القلب والاستفزاز والحسره وكل ماهو سىء ويجيب الضغط











بجد بقينا فى حالة ترثى لها











لدرجة انى مش مصدقه الدرجه الى وصلنالها











شوفوا الصور ولكم التعليق لانى مش لاقيه كلام











Thursday, March 12, 2009

خدعوك فقالوا....




برنامج خدعوك فقالوا على قناة اقرأ لمصطفى حسنى..اكتشفته بالصدفه من تنويه عن البرنامج الجمعة الى فاتت بس رغم انه بقاله كزا حلقه وده لانى مبتابعش اقرأ من مده طويييله جدا مبقتش تعجبنى او هيا من البدايه مكانتش عاجبانى بمذيعاتها الى ميك ابهم ولبسهم وحواجبهم الاوفر ويقولوا احنا قدوة فى الحجاب :-)
المهم
لانى بحترم مصطفى حسنى بحس انه بيتكلم بواقعيه ومبيدعيش علم هو ليس اهله فقلت اشوف البرنامج موضوعه ايه طلع عن اييييه بقا؟
عن تحسين العلاقات الزوجيه فى الدين الاسلامى ومن الناحيه العمليه والنفسيه وبيقترح بعض الافكار الصغيره الى ممكن يعملها الزوج او الزوجه تدخل السعاده او تزيد القرب لبعض وبيطرح بعض المشكلات وايه سببها وازاى ممكن نحلها
....وكمان اتكلم عن حاجه حلوة ان الكبر والعناد والخصام ده من الاخلاق الابليسيه الى بسببها طلع من الجنه بسبب جهله وكبره ومعصيته
وكمان استعان بجزء من كلام ابراهيم الفقى المعروف فى علم تطوير الذات وتحسين العلاقات الاجتماعيه وده علم حديث منتشر جدا دلوقتى فى ارجاء العالم وبجد علم بحترمه
بجد عجبنى ان فى برنامج عندنا كده بيتكلم من النواحى المختلفه وبيربطها ببعض واسلوب الخطاب مبسط وعملى وهدف جميل تحسين بيوتنا واسرنا المسلمه تكون افضل وافضل
الحلقه الجايه ان شاء الله يوم الجمعه هيتكلم عن الرسول صلى الله عليه وسلم وسنته وبعدها يكمل عن العلاقات الزوجيه
ياريت المتزوجين والمتزوجات والغير متزوجين كمان نداااء عاجل بيب بيب تابعوا البرنامج
وشكرا

Monday, March 9, 2009

صدق ولا بد ان ايييييييه لا بد ان تصدق وتقول عادى

كل سنه والجميع بخير وصحه وعافيه
وكل عام ونحن جميعا الى الله اقرب ولسنة رسوله اقرب

شوية حاجات كده حاسه انها غريبه جدا او ملهاش تفسير منطقى عندى

زى عجائب الدنيا..زى القطه الى لابسه ضفدع فوق دى كده

حاجات متفرقه كل شويه تخطر فبالى بس قلت اجمعها تطوعا منى زى مايكون مقال صدق او لاتصدق كده

1_حاجه غريبه ان كل الناس فى بلدنا ساخطه على نظام التعليم ووزير التعليم من سنواااات طويله والنظام التعليمى اثبت فشله الساحق الماحق وتخرج الملايين من الحفظه الذين يحملون اسفارا..مما يسبب فساد النظام ده ضياع قدرات ومواهب حقيقيه

مفكروش ولا لحظه ولا يوم يغيروا الوزير ولا النظام ولا حتى يستعينوا بصديق اقصد لجنه او اى جهه من بره تغيرلهم المناهج مدام همه مش عارفين؟؟

2_حاجه غريبه فبلدنا ان نقوم بتصدير الغاز الطبيعى والمشكله مش فى انه بيتصدر لعدونا ولا بارخص من سعره لا ابدا حاشا وماشا..الاعجب ان التصدير ده بيكون الفائض يعنى المواطن له الاولويه فى استخدامه بدل ماهو احياء كتير مشافتش الغاز الطبيعى ومتعذبه بالانابيب واحنا نروح نطلعه بره؟

3_حاجه غريبه جدا كل مايجيبوا واحده محجبه فى مسلسل او فيلم تطلع حاجه من اتنين انها تعرضت لظروف نفسيه صعبه وقاتله واتسرعت ولقت انه ملوش لازمه والحجاب حجاب القلب او او او انها تطلع معقده وحافظه مش فاهمه وتقعد توعظ فى الناس وتكلم باللغه العربيه الفصحى وتعيد نفس الكلام زى الشريط السافف او الانسان الالى بشكل منفر تخليك تكره الحجاب والى بيلبسوه

مع انه برىء منهم براءة الذئب من دم يوسف عليه السلام

مش مفروض الاعلام ده بيمثل واقع الناس؟ ولا الواقع بتاعنا هو حين ميسرة ويعقوبيان وبدون رقابه؟

زهقنا بجد من الاعلام الموجه ده

4_حاجه غريبه جدا ان الوزير عندنا بيجى من برة الوزارة خالص ومن تخصص تانى ولا ليه علاقه بحاجه ولا بمشاكل الوزارة ولا الناس ولا من وكلاء الوزارة ويجى يقعد يجرب ويجرب لحد مايخرب الدنيا ويجى غيرة ويجرب ويجرب بردو يللا ربنا يقويهم ويوصلوا لنتيجة الابحاث العلمية دى المقامه على الشعب المصرى

5_حاجه غريبه جدا اننا بننقل قدرات الناس المتفوقه عندنا علميا او فى اى مجال واصبحنا بيئة طارده لاى ابداع او تفوق واغلب اصحاب الاكتشافات والابحاث والجوائز كلهم يعملوا فى الخارج ولا ينوون العوده هل هذا لايهم احد؟ لا ويجيبوا فى الاخبار ان ده مصرى وابويا مصرى يافرحتى بس الابحث والجائزة طالعه من بلد اجنبى وليها وباسمها

6_حاجه غريبه جدا اننا اتعودنا فمجتمعنا من اهل الزوج الا من رحم ربى طبعا ان يتم التعامل مع الزوجه على انها متهم حتى تثبت برائتها وتثبت انها اقوى من الجمل فى تحمله وصبره..وبعد فترة طويله من كل ده ممكن يرضوا عنها ويقولوا انها غلبانه وعاوزه تعيش مع ان ده نفسه لو حصل لبنتهم الدنيا تقوم ومتقعدش؟؟ ياترى ليه اكيد دى بنت البطه البيضا ودى بنت البطه السودا كل واحد ولونه بقا يعرف مقامه



Thursday, March 5, 2009

ظلال حزينة


مش عارفه ليه حاسه بحالة حزن ..حاسه انه قلبى موجوع من الحزن
احساس صعب يمكن كل واحد بتعدى عليه فتره بيحس بيه لاى سبب من الاسباب وربنا مايكتبه لحد ويسعد كل الناس
بس المرة دى احساس بسبب انى حاسه ان الدنيا بقت صعبه ومادية لاقصى حد وده متفاجئتش بيه بين يوم وليله بس يمكن وصلت لمرحلة القمه من انه بجد ليه بقينا كده
......
زى مايكون كفتين ميزان كل ماواحد يتقل التانى يقل
تتقل كفة الدنيا والفلوس ولمنصب والاهتمام برفاهية الحياة او حتى عشان يلاقى قوت بيته وولادة الكفه التانيه بتخف
ليه مبقناش قادرين نوازن بينهم زى مامرنا اسلامنا وزى ماكنا كده من زمان اكتر حاجه بتميز العرب الناحيه الروحانيه والعاطفيه ولمة العيله والعشرة والصداقه
....
عارفه انه لسه فى ناس كويسه ولسه فى خير وربنا يزيدهم اكتر واكتر
بس يمكن حاليا من كزا موقف فى الفترة الى فاتت حاسه ان ناس كتير بقت نفوسهم وحشه اوى
وامتد الموضوع يمكن لاقرب الناس فى بعض الاوقات من صحاب وقرايب
بقينا كلنا بنشتكى من قسوتنا على بعض من جرحنا لبعض
من حسد وغيره ومقارنه بين الصحاب واللى يمتد بين الاخوات او زوجج الاخت وزوجة الاخ ..من قسوة الحموات ..من قسوة الزمايل والانانيه ولغة المصالح بين الزملاء فى العمل والدراسه والجيران؟؟!!
الفترة دى حاسه اننا وصلنا لمرحله وحشه اوى وكل شوية بتسوء اكتر
.....
ليه حسد وغيره ومقارنه وربنا هو الى بيوزع الارزاق
لن يصيبك الا ماكتب الله لك هيجيلك رزقك المكتوب لك فوقته ومعاد ومحدش عارف الخير فين ويمكن جاى فى الطريق ولا لازم نستعجل علطول
ليه الفضول والحشريه والتدخل فى خصوصيات بعض بقلة احترام وبطرق تجرح ده رسولنا علمنا من اساسيات الاسلام..من حسن اسلام المرء تركه مالايعنيه!!!
سبحان الله
الانانيه والمصالح والفهلوة
نسينا الايثار والتعاون على البر
الرسول قال لايؤمن احدكم حتى يحب لاخيه مايحب لنفسه
سبحان الله ربطها بالايمان
مش عارفه اقول ايه
بقيت حاسه اننا فى زمن الالات والماديات والحياة الاستهلاكيه ولغة التيك اواى ويلا نفسى
سباق مادى عشان نعيش عشان نتجوز عشان نخلف عشان نربى ولادنا ومن بعدنا الطوفان اى حاجه تانيه مش مهمه
لدرجة ان بعض الناس انانيتها بتغل عليها ومبتربيش ولادها كويس وبيدوهم فلوس وكفايه
لييييييه وصلنا لكده؟ وكل ده عشان ايه
هناخد ايه معانا واحنا ماشيين؟
ياريت الواحد كان موجود ايام اجدادنا لما كانوا بيعرفوا معنى العشرة ولمة العيلة والجيرة والصداقة
نفسى يجى يوم افضل نكون فيه افضل مع بعض
وتروح حالة الحزن دى

Sunday, March 1, 2009

اصداف البحر...


اصداف البحر.... من منا لا يتذكر شكلها على شاطىء البحر او فى اللوحات حينما تحتوى بين ذراعيها تلك الؤلؤة اللامعه
عندما اتذكر شكل الصدفه ..اتذكر شىء جميل بيننا
نعم لاتتعجب فتلك الصدفه تشبهنا تذكرنى بعلاقتنا معا فى جمالها وقوتها واحتوائها
فانا وانت مثل جانبى الصدفه ونحتوى بيننا هذا البيت الزوجى الذى يحمل حبنا وعلاقتنا وقلبينا معا مكونا تلك الؤلؤة التى داخل الصدفه
فنحن فى فترة الاستقرار والسعادة تغلق الصدفه جانبيها من بعضهم....وفى فترة خلافنا يبتعدكل جانب عن الاخر مثل الصدفه لكن البابين متصلين ببعضهما من الجانب الاخر
فنحن نبتعد قليلا من جانب ويظل الجانب الاخر ممسكا بالاخر
ومثلنا مثل الصدفه بقشرتها الصلبه رغم جمال لونها وشكلها وتعاريجها الا انها تواجه موجات البحر القويه والرمال .....الا انها تظل محتفظه بجمالها وباللؤلؤة التى بداخلها
ليتنا زوجى الحبيب نظل هكذا كاصداف البحر فى جمالها وقوتها وترابطها ...ونظل نحافظ على تلك اللؤلؤة الى بيننا وبداخلنا

Wednesday, February 18, 2009

فنجان قهوة وحفنة ذكريات

هنا لا يوجد شتاء ولا يوجد هواء بارد وانما يوجد امطار قليله من وقت لاخر؟؟!!!
اشتقت لمصر ولشتاء مصر
اشتقت لبرد يناير
عندما كنت العا م الماضى هناك كنت انتظر بفارغ الصبر عودتى من العمل لاعود للمنزل لابدأ طقوسى
البس الروب والشراب والزعبوط وكل اللبس هههه رغم انى برادة غريب امرى بحب البرد ليه ياترى؟
بحب جو الشتاء الهادى من زمان مرتبط معايا بالقراءة والاستمتاع والاستجمام والهدوء والرومانسيه
من بعد تخرجى كنت استمتع بكوب النسكافيه واوقات السحلب لاقعد اقرا واقرا وكمان الوقت ده كان بيكون فيه معرض الكتاب واروح اشترى كتب واخلص كل فلوسى كان دى اخر مره هلاقى كتب فيها بعد كده
واقعد اقرا فى الى جبته بعدها شهر واتنين ومده
فى العام الماضى جه التدوين وظهر فحياتىكنت بردو بعمل النسكافيه او القهوة واقعد اقرا المدونات او اكتب وافضل سهرانه او الصبح بدرى اقعد اقرا واكتب
كانت ايام جميله لما بفتكرها باحن لها واشتاق لها
يمكن حاجه بسيطه فى حياتنا وجودها بيعمل فرق بيدينا متعه بيحسسنا اننا بنعمل حاجه بنحبها قصاد مصاعب ومتاعب الحياة
ولما بنبعد عنها ونحس بقيمتها ونفتقدها ونقول ياريت ترجع تانى ولو يومين بس بنعرف اد ايه فى حياتنا حاجات جميله يمكن صغيره او كبيره او بسيطه بس بتاثر فينا
الدنيا مش كلها وحشهوصعبه بس اوقات بنحتاج نلبس نظاره نظر محايده لا لونها روز ولا نظاره لونها اسود..عشان نشوف الامور اوضح
يمكن كتير نفسهم يسافروا من البلد ومشاكلها وظروفها وكنت واحده منهم ولما جيت اسافر كل الناس كانت شايفه انى محظوظه ومحتاجه اتحسد لانى رايحه الجنه وهربت من الجحيم
والحقيقة ان الخيال حاجه والواقع حاجه تانيه واللى بيقول مهما كان ارحم من هنا هقول بس ان الكلام والخيال حاجه والواقع الملموس حاجه تانيه تعيشه بنفسك مش سماعيا
مش هدخل فقضية السفر وتجربة الغربه دلوقتى
بس حاليا كل الى فبالى ان مصر واحشانى بناسها واصحابى واهلى وكوب القهوة او النسكافيه فى الشتا الى كان على مكتبى فقوضتى وانا سهرانه على النت بتصفح الدنيا
اظاهر انى طلعت وطنيه وبحب مصر؟؟ :-)

Saturday, February 14, 2009

الزواج..والابناء..والعمل..والاصدقاء..والكتب والعلم؟؟






بعد انقطاع مده طويله عن التدوين مع محاولة المتابعه عن بعد من فتره لاخرى رجعت الحمد الله ووحشتوووونى كلكم الى فاكرينى والى نسيونى واحشنى التدوين واهله وصحبته وبجد بشكر كل الى علقوا هنا وسالوا عليا فى غيابى ..الفتره الى فاتت كانت فى زواجى وفى سفرى لزوجى خارج مصر احد دول الخليج ومحاولة التاقلم على الغربه والحياه الجديده ...لكن الحمد الله رجعت تانى




رغم انها مش مده طويله ولا قصيره بس حسيت ان حاجات كتير اختلفت حوليا فى الدنيا وفى مصر وفنظرتى للدنيا حاجات بقت اجمل وحاجات بقت اوضح وحاجات بقت محتاجه تصليح ووقفه وهكذا كتيييير


والاهم كمان انى بقيت اطلع كل فلسفتى وافكارى لزوجى تعويضا عن الكتابه ههههه ربنا يكون فعونه


النهارده هبتدى بموضوع لفت انتباهى رغم انى راجعه وعندى حاجات كتير اوى اتكلم فيها بس محتاجه لسه اشحن من تانى






الحاجه الى لاحظتها هنا اهتمامهم الكبير فى مكتبات كبيره وشيك كتير بالكتب الدينيه ونوع تانى من الكتب طبعا الدينيه ده عادى موجود كمان فى مصر لكن الى لفت وشد انتباهى جدا كتب ايييييه؟؟


كتب تطوير الذات والتنيه البشريه وتحسين العلاقات وادارة الاعمال


وكلها او اغلبها كتب مترجمه من كب اصليه لعلماء ودكاتره فى المجال ده اجانب




هتقولولى الكلام ده مش جديد موجود فمصر كمان وده حقيقى لانى من قبل ماسافر كان ده موجود وكمان عرفت بالصدفه ان زميل ليا من دفعتى د شريف عرفه رغم انه طبيب اسنان بقا من المعروفين فى المجال ده بعد دراسته ليه والف كتاب كمان ماشاء الله وكان ليه ندواته وقريب فى معرض الكتاب الى فات نزل كتابه التانى وكمان حاليا فى ساقية الصاوى دورة عن التواصل والتعامل مع الاخرين


وطبعا ابراهيم الفقى رائد المجال ده من سنوات




كل ده جميل


لكن المهم هنا حسيت ان الموضوع منتشر اوى وليه مراكز لتلقى الدورات دى والكتب هنا منتشرة بشكل كبير والناس محترمينها جدا طبعا هنا الامور مش زى مصر فى الحريه بالنسبه للكتب فهدفهم ان الكتب دى مفيده وتغنى عن الروايات والقصص الغراميه ووو لكن طبعا كله موجود وحتى لو منع من مكان ولا اتنين برضه موجود فكل مكان على الاقل النت


وكمان فى مصر الكتب دى قليله واماكن توزيعها قليله لانى حاولت ادور عليها فمصر معرفتش اوصل لحاجه وكمان لما بتلاقيها بتكون غاليه


فى البدايه كانت نظرتى للكتب دى والموضوع ده انه كلام استهلاكى ونظرى وتحفيزى انك تكون احسن وكلام كله نظرى وصعب تنفيذه وانى اقرا كلام يحلل شخصيتى وكده من باب الاطلاع على العلوم الاخرى والهوايه انى بحب اقرا فكل حاجه وعلم النفس منها مش اكتر حاجه مش جد يعنى


وبعدين حاولت اقرا واقرب واندهشت لقيت انه فعلا علم كبير مبنى على دراسات وبيتناول كل حاجه يعنى فروع كتير تطوير ذاتك كشخصيه ومحاولة التخلص من عيوب معينه تطوير عملك تطوير علاقاتك مع الاخرين علاقتك وتربيتك لابنائك علاقات الزواج وعلاج مشاكلها
والاسلوب يشد بيوصلوه من خلال قصص لناس مختصره كانك بتشوف نفسك وتصرفاتك فيها وبيقربلك فكرة التغيير والتطوير ازاى تحصل


والاجمل مناقشة العلاقات الزوجيه ..المعتاد اتعودنا نسمع حولينا طول الوقت نصايح نصايح من الى قدنا والى اكبر منا ومش دايما كل النصايح بتكون صح او ملائمه لكل زوجين وكل بيت اما هنا الموضوع مختلف لان كل شخصيه لها نمط وطباع وصفات معينه بيلائمها حاجات معينه واخرى لايلائمها نفس التصرفات بالاضافه للاختلافات بين الرجل والمرأه فى الصفات والاهتمامات ويمكن ده الى بيسبب الخلافات لزوجيه عدم قدرتنا على فهم الاختلافات دى





الغريب اكتر ان الاسلام حط كل المعايير والتوجيهات دى فى الاعقات الاجتماعيه كلها الزوجيه فى العمل مع الابناء مع الاصدقاء لكن احنا كلمعتاد غفلنا ده لحد مالغرب درسوا ده وحللوه وكتبوه بس من وجهة نظر علميه علمانيه غير مرتبطه بالدين مرتبطه بس ازاى تكون انجح وافضل واسعد فى حياتك ومع من حولك

رغم ان الكلام ده موجود عندنا من مئات السنين





الزمن ده بقا سلاحه الوحيد والاقوى والابقى هو العلم ...زمان كان الحروب والرشاشات والمدافع لكن دلوقتى العلم هو سيد الموقف فى كل حاجه اقتصاديا زراعيا اجتماعيا سياسيا .....وللاسف اننا امة اقرأ الى لاتقرأ الا من رحم ربى

والى بيقرا يوم مايقرا يقرا كلام الغرب وكلام علمانى فى اغلب الاوقات موجه لافساد حاجات كتير

نفسى نطلع من ظلام الجهل ده نفسى نستغل كنوز اسلامنا وطاقاتنا البشريه

نفسى حاجات تتغير فينا ونقدر احنا نغير بقا