كل سنه والجميع بخير وصحه وعافيه
وكل عام ونحن جميعا الى الله اقرب ولسنة رسوله اقرب
شوية حاجات كده حاسه انها غريبه جدا او ملهاش تفسير منطقى عندى
زى عجائب الدنيا..زى القطه الى لابسه ضفدع فوق دى كده
حاجات متفرقه كل شويه تخطر فبالى بس قلت اجمعها تطوعا منى زى مايكون مقال صدق او لاتصدق كده
1_حاجه غريبه ان كل الناس فى بلدنا ساخطه على نظام التعليم ووزير التعليم من سنواااات طويله والنظام التعليمى اثبت فشله الساحق الماحق وتخرج الملايين من الحفظه الذين يحملون اسفارا..مما يسبب فساد النظام ده ضياع قدرات ومواهب حقيقيه
مفكروش ولا لحظه ولا يوم يغيروا الوزير ولا النظام ولا حتى يستعينوا بصديق اقصد لجنه او اى جهه من بره تغيرلهم المناهج مدام همه مش عارفين؟؟
2_حاجه غريبه فبلدنا ان نقوم بتصدير الغاز الطبيعى والمشكله مش فى انه بيتصدر لعدونا ولا بارخص من سعره لا ابدا حاشا وماشا..الاعجب ان التصدير ده بيكون الفائض يعنى المواطن له الاولويه فى استخدامه بدل ماهو احياء كتير مشافتش الغاز الطبيعى ومتعذبه بالانابيب واحنا نروح نطلعه بره؟
3_حاجه غريبه جدا كل مايجيبوا واحده محجبه فى مسلسل او فيلم تطلع حاجه من اتنين انها تعرضت لظروف نفسيه صعبه وقاتله واتسرعت ولقت انه ملوش لازمه والحجاب حجاب القلب او او او انها تطلع معقده وحافظه مش فاهمه وتقعد توعظ فى الناس وتكلم باللغه العربيه الفصحى وتعيد نفس الكلام زى الشريط السافف او الانسان الالى بشكل منفر تخليك تكره الحجاب والى بيلبسوه
مع انه برىء منهم براءة الذئب من دم يوسف عليه السلام
مش مفروض الاعلام ده بيمثل واقع الناس؟ ولا الواقع بتاعنا هو حين ميسرة ويعقوبيان وبدون رقابه؟
زهقنا بجد من الاعلام الموجه ده
4_حاجه غريبه جدا ان الوزير عندنا بيجى من برة الوزارة خالص ومن تخصص تانى ولا ليه علاقه بحاجه ولا بمشاكل الوزارة ولا الناس ولا من وكلاء الوزارة ويجى يقعد يجرب ويجرب لحد مايخرب الدنيا ويجى غيرة ويجرب ويجرب بردو يللا ربنا يقويهم ويوصلوا لنتيجة الابحاث العلمية دى المقامه على الشعب المصرى
5_حاجه غريبه جدا اننا بننقل قدرات الناس المتفوقه عندنا علميا او فى اى مجال واصبحنا بيئة طارده لاى ابداع او تفوق واغلب اصحاب الاكتشافات والابحاث والجوائز كلهم يعملوا فى الخارج ولا ينوون العوده هل هذا لايهم احد؟ لا ويجيبوا فى الاخبار ان ده مصرى وابويا مصرى يافرحتى بس الابحث والجائزة طالعه من بلد اجنبى وليها وباسمها
6_حاجه غريبه جدا اننا اتعودنا فمجتمعنا من اهل الزوج الا من رحم ربى طبعا ان يتم التعامل مع الزوجه على انها متهم حتى تثبت برائتها وتثبت انها اقوى من الجمل فى تحمله وصبره..وبعد فترة طويله من كل ده ممكن يرضوا عنها ويقولوا انها غلبانه وعاوزه تعيش مع ان ده نفسه لو حصل لبنتهم الدنيا تقوم ومتقعدش؟؟ ياترى ليه اكيد دى بنت البطه البيضا ودى بنت البطه السودا كل واحد ولونه بقا يعرف مقامه
24 comments:
ياترى ممكن اكون انا اول تعليق
يارب اكون اول تعليق
كل سنة وانتى طيبة يا قمر
كلامك كله صح في تناقضات كتير اوى والغلط مش بيتصلح بالعكس بيكون في تمادى في الغلط وربنا يعينا على كل دا
عجبنى اوى موضوع اهل الزوج دا ومعاملتهم لاهل الزوجة اصله جه على الوتر الحساس
هههههههههه
تحياتى ياقمر
نسيت اقولك لو مش عندك مانع ممكن نتكلم على الايميل
لو حبيتى قوليلى وانا ابعتلك ايميلى
لانى بجد حاسه اننا ممكن نكون اصدقاء بجد ودا انا لمسته من ذوقك وكلامك الجميل
عزيزتى
الغرائب مليانه فى كل شئ فى حياتنا
والبرامج والتوك شو بتجيب الضغط وتتعب الاعصاب
وكلها كلام ومفيش شئ بيتغير
والهجوم على الحجاب والنقاب بقه اكتر من الهجوم على العرى والانحلال
وتلاقى المذيعه تتحجب يمنعوها من التليفزون المصرى
ولو مذيعه قلعت الحجاب هيرحبوا بيها فى التليفزون المصرى
وموضوع الغاز اللى مش من حقنا نعرف ليه بيعملوا كده
وكل شئ تزنقهم فيه
يقولوا الامن القومى المصرى
كأن من حقهم بس يعرفوا الامن القومى المصرى ايه واحنا لا
يلا الايام الجيه مخبيه كتير
تحياتى
سلام
انا اول مكرر
بوست جميل فعلا وفعلا حاجة غريبه حاجة عجيبة الدنيا بئا ليها طعم غريب
كل سنة وانتي طيبةةةةةةةةةة
دمتي بالف خير
والله هو للاسف مصر بلد العجائب ..
كله حاجات متناقضة ومختلفة ..
والقاعدة تلاقى عكسها تماما ..
وحسيت ده اكتر لما عشت بره مصر ..
وبقيت اسأل نفسى سؤال واحد .. ليه ما نبقاش كده ؟؟
ليه كل حاجة منظمة ومرتبة وناس عايشة ومبسوطة فى كل البلاد ومصر لا ..
لما بفتح البيت بيتك علشان افضل مع تواصل واعرف اخبار البلد بجد بكتئب من كمية الاهمال والتراجع اللى بيذكروها ..
الحبيبة الشموع البيضاء ما تستغربيش فهذه هى بلدنا ياغاليتى ..
دمت بخير ..
كل سنة وانتى طيبة
وربنا يعيد عليكى وعلى اسرتك الايام بكل خير
كل سنه وانتي طيبه يارب وفعلا الحاجات الي بتقولي عليها عامله زي صدق او لا تصدق فعلا غرائب وعجائب ربنا يرحمنا بقى لحسن تعبنا قوي من الحكومه دي وشكرا لمرورك على مدونتي وشرفتيني
انتى فين قلقت عليكى والله
كل دا يابنتى عشان الايميل
خلاص ياستى بلاش ايميلات
انا بهزر معاكى ياقمر اصلى بجد قلقانة عليكى
وان شاء الله يكون المانع خير
السلام عليكم
عارفة المشكلة ان البعض عارفين الغلط فين وازى يتصلح وفين البديل لكن مفيش عمل ولاجهد ولانطباط
وحد بيدور غير على مصلحتة وبس ودة مرجعنا كتيرر ولسة
ربنا يصلح الحال
.
تحياتى
هما بيغروا فى المناهج مش دى المشكلة
المشكلة هما بيغروها ويحطوا اية
دى بتبقى من الاسوا الى الاسوا زى ما يكون التغيير اللى هما بيعملوه دة هيخليهم عباقرة وعجبى
يا بنتى فى حاجات كتير بتتصدر مش الغاز بس وبتبقى مش من الفائض
الاعلام دة مش واقعى بالمرة وانا بتفرج اتسلى وخلاص
والوزير اة ما دى موضة ويخدوا من وزارة للتانية تغيير يعنى
اصلهم فى الخارج بيقدروا العقليات الخارقة
تصورى انا كمان قلت كدة لما حماتى ضيقتنى
قلت هى نسيت انها عندها بنات
ربنا يسامحها
تحياتى
خدي عندك
اولا ربنا ينتقم من كل من ظلمنا وظلم ابناءنا وحولهم الى مخلوق مكتئب صغير بيهرب بالنوم من مناهج يعجز سقراط عن استيعابها للحشو والمحشي اللي فيها .. سياسة داخلية علشان نلف حوالين نفسنا اكتر ما احنا لافين
ثانيا تصدير الغاز ده موش علشانا .. نو ابسلوتلي
ده علشان تعميك العلاكات الدولية وتربيط اللي بيتكتع بأيدي اعداء الشرك الأوست الكديد
نقعد احنا بالأنبوبة علشان نبقى شعب شديد كده وعضلاتنا تقوى وفلوسنا كتيرة "الأنبوبة وصلت 15 جنيه وهي في المستودع ب 4 جنية ونص .. ربنا يزيدنا رخاء كمان وكمان"
ثالثا يعني بالله عليكي لما تطلع ليكي مومياء من متحف الشمع بتقول خنت جميع ازواجي اللي اتجوزتهم .. والوسط الفني له معايير خاصة بيه غير حياة الناس العادية"
ولا الجزمة مخرجة المواسير اللي بتقول ياريت نرجع بيوت الديعارة تاني علشان نعمل كنترول على صحة المواطنين
عاوزة يطلع ليكي واحد منهم يقول للنسوان احترموا نفسكم واتبعوا اوامر ربكم؟
لازم الشيطان يزين لهم اعمالهم حتى يأخذهم ربك اخذا عزيزا
رابعا لازم الوزارة يجي فيها واحد يجرب في اهلنا
نموت نموت وتبقى الوزارة
خامسا يابخت اللي لقى ليه متوى هو وعلمه
وياحسرة على ضياع املنا العلمية المعملية الفذة
سادسا اهل الزوج في كل الافلمنات والمسلسلات بيشوفوا الويل على يد الولية الحيزبونة مرات ابنهم
اللي بتتقصع ليه وتوسوس له بإيذاء بابا وماما وطنط
ده غير قصص بريد الجمعة واريد حلا واريد خلعا كمان
وعليه بيخضعوها لأختبارات الجودة التي تصل لبسترتها وغليها حتى التأكد من تمام التعقيم
خلاص تعبت
انا اسفه ياجماعه والله انى اتاخرت فى التعليقات لانى كان بقالى يوم الاشتراك خلص وعلى ماقلت لزوجى يجددلنا الاشتراك خدت لتانى يوم وامبارح بليل دخلت ملقتش حاجه بس شكلكوا الصبح كنتوا نشيطين هههه
بس بجد سعدت جداااا لما فتحت لقيتكوا كلكوا متواجدين رغم انى اعرفكوا قريب بس بجد ماشاء الله كلكوا ناس احسبها على خير
ريم بجد اسفه انى اتاخرت لا والله ابدا القلوب عند بعضها ومش الى قصدك خالص الموضوع كله ان النت وقع منى يومين كده وليا الشرف والله ويشرفنى نكون صحاب وهبعتلك ايميلى عندك ان شاء الله
احساس لسه حى
نورتينى عندك حق والله فموضوع المذيعات لما بيتحجبوا ويبقوا محترمين يمشوهم سبحان الله
اما بالنسبه لموضوع الامن القومى بقا فتقريبا هو امن قومى لبلد تانيه غير الى احنا فيها وبرده تحسى انهم بيتعاملوا معانا بسياسة همه الكبار الى عارفين مصلحتنا واحنا مش فاهمين حاجه :-) تحياتى
عروسه اهلا بيكى
وانتى طيبه وبالف خير ياعروسه ياجديده :-) ربنا يوفقك ويسعدك يارب
تحياتى
لجين ابو الذهب
كلامك صح فعلا
عارفه وانا فمصر كنت حاسه بالحاجات دى وقلبى واجعنى لما اتغربت وجوزى عندة ادمان متابعة اخبار مصر ولبرامج كل يوم الى بتجيب كل السلبيات والاكتئاب بجد الواحد بيحزن اوى اوى
نفسى بجد يوم يكون احسن عشان ولادنا ان شاء الله
يارب
تحياتى
desert cat
اهلا بيكى
وانتى طيبه وبالف خير
نورتينى ياجميل
حاسوباتيه
اهلا بيكى
وانتى طيبه وبخير
فعلا احنا عايشين فى مسلسل يومى من غرائب وعجائب ربنا يرحمنا
تامر نبيل
عندك حق والله احنا محتاجين نصلح بقا بجد من انفسنا او من السللبيات الى حوالينا بجد محتاجين نبقا ايجابين اكتر فحياتنا
اهلا بيك
زوجة عنيده
موافقاك فى الراى نقطه نقطه
خاصة فموضوع التفرقه فى المعامله بتاع الحموات بجد ربنا يهدى الجميع لاننا فلا من الناس الى بحب اعيش الحياة فى سلام وهدوء ومبحبش المنغصات دى بس ان شاء الله فترة وتعدى او عشان خاطر اجوازنا لازم نقدر انهم اهاليهم وامرنا لله :-)
ستيته بجد كلامك فى الجووون كله
والله انا اتصدمت من خبر العجوز الموميا الى فرحانه بخيانة ازواجها سبحان الله زمن مبقاش فيه حياء خلاص
ولا المخرجة الزفت دى الى قارفانا بثقافتها المريضة الى مصرة تشربهالنا بالمعلقه حاجه تقرف
اما موضوع اهل الزوج انتى قلتى نقطه مهمه جدا والله انه فعلا الاعلام كان ليه دور انهم يطلعوا مراة الابن وحشه لحد مابقت تتعامل زى ماوصفتها متهمه لحد ماتثبت برائتها مع ان ناس كتير والله متربيه انها تبقا كويسه وبتعامل ربنا قبل اى حاجه
بس تعرفى مسير الاصل بيبان والخير الى بيتعمل لربنا عمرة ماهيروح كده وخلاص
تحياتى بسعد جدا بتعليقاتك لاسلوبك المميز وسلامتك من التعب ياجميل
بوست الغرائب بالفعل بس كل الغرائب دي لما نقارنها بالمستوى اللي وصلنا ليه لازم منستغربش ونعرف سبب تخلفنا ايه
تحياتي
هي دي مصر ياعبله
قصدي ياشموع
كله كوم وعجيبه الغاز دي كوم تاني
شيبك من ان الغاز الطبيعي مش واصل للاغلب المناطق
دي في ناس مش لاقيه الانبايبيب
وبنستوردها من بره
يالاهوي
انا شكلي مش فاهمه
ههههههههههههههههههههه
فيه حاجات نقدر نغيرها وفيه حاجات ناس تانيه هى اللى المفروض تغيرها وفى الوقت الحالى مفيش اجه هتتغير
Post a Comment